Glayiu.org :: Les cifres de los puestos a déu n´Alministración asturiana

Va pocos díes que cuatro centrales sindicales con representación na Xunta de Personal Funcionariu del Principáu d´Asturies denunciaben un descomanáu aumentu del númberu de puestos de llibre designación o a déu, como corrientemente se-yos conoz.
Los voceros sindicales talantaben qu´esti incrementu de los puestos de trabayu de confianza política taba frayando les condiciones d´imparcialidá imprescindibles pal desendolcu d´un llabor respetuosu col interés xeneral, al empar qu’afitaba una carrera profesional dirixida pola clas gobernate, lloñe de los principios de igualdá, méritu y capacidá qu´impón la Constitución. Dalgún periódicu recoyó’l datu de que los puestos a déu nel Principáu superaben yá’l 20 por cientu.
Pa salir de duldes y esclariar la cuestión nun se nos ocurre métodu meyor que tirar de les cifres espublizáes pol propiu Gobiernu autonómicu. Asina, na rellación de puestos de trabayu del personal funcionariu correspondiente a la pasada llexislatura (BOPA de 6 de marzu de 2007) – nun incluye al personal educativu, al sanitariu, nin al llaboral -, atopamos un total de 492 puestos de nomamientu dixital, demientres que na rellación de puestos de trabayu vixente ( ta acabante de espublizar nel BOPA de 16 de mayu d´esti añu) el númberu de plazes a déu ya sube a 550. Ye dicir, el datu oxetivu ye que crecieron, en apenes un añu, un 13 por cientu.
Pa valorar lo que supón esta cifra, tien que partise necesariamente del presupuestu de que pa la llei la llibre designación debe ser un procedimientu esceicional, estraordinariu, frente al concursu de méritos, que ye el sistema normal de nomamientu na función pública, precisamente pa respetar una carrera profesional imparcial y oxetiva.
Siendo asina que na rellación de puestos de trabayu espublizada’l 16 de mayu atrópense un total de 2.086 puestos singularizaos, ye dicir, d´ascensu na carrera profesional o de nivel superior a los puestos d´entrada o puestos base, los 550 provistos pol sistema del déu o de la confianza política suponen el 26,36 por cientu de los puestos d´ascensu pal personal funcionariu.
Con esti porcentaxe de nomamientos a déu, ¿pue dicise que la llibre designación ye, como esixe la llei, un sistema esceicional n´Alministración del Principáu d´Asturies?
Pero l´asuntu enrevésase bastante porque a lo espuesto añádese que la llegalidá tamién s´esfraya colos puestos de trabayu a cubrir por concursu de méritos, porque los concurso nun se convoquen nos plazos estipulaos. La llei diz que los puestos vacantes nun puen ocupase provisionalmente más d´un añu y que tienen que sacase a concursu nesi plazu, pero na práutica les convocatories nun se facen y los nomamientos provisionales o en comisión de servicios duren dellos años. Cómo estos nomamientos provisionales fácense tamién pola vía dixital, alcontrámonos “de facto” con un sistema de carrera profesional puestu al revés: el concursu de méritos ye la esceición y la llibre designación la regla xeneral.

Si esta ye la rempuesta a la denuncia sindical, la pregunta nun pue ser otra qu´el clásicu cui prodest: ¿a quién beneficia un sistema de carrera profesional na función pública asturiana sofitáu na confianza política?


Javier Álvarez Villa,
Silvino Cordero Pando
Xurde Blanco Puente