Na primavera del añu 2006 una serie de reportaxes periodísticos dexaron al descubiertu que´l 73 por cientu de los centros de reforma de menores del Estáu español taben xestionaos per entidaes privaes. Amás, tolos servicios apareyáos a estos centros, como la llimpieza, l´alimentación o la segurídá, alcontrábense axudicaos a empreses que teníen equí una fonte bayurosa de negocios paralelos a la reinserción social de los menores. El datu daba respigu porque, d´un lláu, contrastaba cola situación esistente nel añu 2001, nel qu´entró en vigor la Llei de Xusticia Xuvenil, onde tolos “reformatorios” yeren de titularidá y xestión públiques y, d´otru, porque espeyaba que la execución y el control de les midíes xudiciales de privación del derechu fundamental a la llibertá de los menores taba siendo abandonáu dafechu pola Alministración Pública nes manes d´asociaciones y empreses privaes, arrenunciando –ente otres coses perimportantes- a la escoyeta del personal educativu, sanitariu y de vixilancia de los centros y a la regulación de les sos condiciones de trabayu.
El cinismu y la inmoralidá que treslluz esta situación nun tien llendes. Si na cultura xurídica española dalguien plantegase güei’l proyeutu de privatizar el sistema penitenciaru d´adultos munches voces glayaríen sobre la indecencia de facer negocios cola privación de llibertá de los seres humanos, pero agora que se conoz qu´esti modelu mercantil ya ta implantáu nel Estáu español y furrulando a plenu rendimientu económicu cola población más flebe y necesitada d´amparamientu, respetu y proteición, lo más de la xente nun va más p’allá de sorprendese al lleer la noticia nel periódicu, y pasar páxina.
El casu de los centros d´internamientu de menores ye un más, magar que dramáticu, nun procesu de llargu percorríu pol que l´Estáu de Derechu vien delegando en ONGs y entidáes asemeyaes la xestión de sectores asistenciales básicos, caros y problemáticos. ¿Cómo pudo llegase a esta dexeneración del Estáu Social? Hai que remontase a los primeros años de la década de los 70 del pasáu sieglu, onde empecipia la “crisis fiscal” del Estáu del Bientar –recauda menos de lo que gasta- y tolos fenómenos apareyaos a la “globalización económica” (dende la desregulación financiera y la lliberalización de los monopolios públicos, fasta la posterior venta d´estos al capital priváu y la “esternalización” de la xestión de los servicios públicos) pa columbrar un revuelcu total al sistema social que taba vixente.
Fuente : Xabiel Álvarez Villa / Les Noticies. / Foto:SOS Quebec
Entradas
No hay comentarios:
Publicar un comentario